白话广州　◎闻歌 媒体人

性寒凉，清燥热，系广东凉茶最大嘅特性。不过，唔好以为凉茶乜火都可以除。

呢几日，红罐王老吉因知识产权纠纷要改名嘅新闻，将大家嘅目光又拉到凉茶上来。好长一段时间，围绕红罐嘅拗数，一啲都唔亚于两大可乐嘅“红蓝之战”，谁是谁非？讲起真系一匹布咁长。

响印象中，凉茶几乎系一个八卦行业，日日有新闻，因为争端特别多。前几年，黄振龙同黄志强斗，唔单只打官司，连凉茶铺里边嘅招贴都要斗。边个先系正宗，边个系侵权？真系斗到亲戚都冇面俾。

唔同形态嘅凉茶之间，亦系明争暗斗。药厂嘅人，就话凉茶铺添加西药；凉茶铺嘅人，就话冲剂有糖分同添加剂。总之，大家都唔服气，都想自己独大。

本是同根生，相煎何太急？无非系一个利字。现代人忙到出彩，加上环境污染、饮食失衡，凉茶越来越受欢迎，尤其系方便饮用嘅纸盒装、铁罐装、袋泡装、颗粒装；凉茶铺多过米铺，亦好便利，连冲都唔使。所以，三四蚊鸡一杯癍痧，一样咁好卖。

记得好多年前，一家凉茶公司拍硬心口话，要将凉茶卖到欧美，同可口可乐竞争。作为广东人，真系好佩服咁样嘅勇气。不过，呢几年似乎听唔到咁样嘅豪言壮语。或者，斗唔斗得赢可乐已经唔重要，斗赢本地同行，先系佢哋最紧急嘅事。

成日咁搞内斗，始终唔系办法。你话，有乜凉茶，可以降下呢啲凉茶公司自己嗰把火呢？